2 Chronicles 21
1 Հովսափատը գնաց իր նախնիների գիրկը և թաղվեց Դավթի քաղաքում՝ իր նախնիների մոտ։ Նրա փոխարեն թագավորեց իր որդին՝ Հովրամը։
2 Նրա եղբայրները՝ Հովսափատի որդիները, վեցն էին՝ Եզրիա, Եել, Զաքարիա, Միսայել, Սափատիա և Ազարիա։ Սրանք բոլորը Հուդայի արքա Հովսափատի որդիներն էին։
3 Հայրը նրանց տվել էր բազում պարգևներ՝ արծաթ, ոսկի, զենքեր, ինչպես նաև պարսպապատ քաղաքներ Հուդայում, իսկ թագավորությունը հանձնել էր Հովրամին, քանի որ նա էր անդրանիկը։
4 Հովրամը, ստանձնելով թագավորությունը, հզորացավ ու սրակոտոր արեց իր բոլոր եղբայրներին, նաև Իսրայելի մի շարք իշխանների։
5 Նա երեսուներկու տարեկան էր, երբ թագավոր դարձավ, և ութ տարի թագավորեց Երուսաղեմում.
6 նա ընթացավ Իսրայելի թագավորների ճանապարհներով. արեց այնպես, ինչպես Աքաաբի տունն էր արել, քանի որ նրա կինը Աքաաբի դուստրն էր։ Նա չարիք գործեց Տիրոջ առջև,
7 սակայն Տերը չուզեց կործանել Դավթի տունը այն ուխտի համար, որ դրել էր Դավթի հետ, և ինչպես խոստացել էր նրան՝ միշտ մի ճրագ տալ նրան ու նրա որդիներին։
8 Այդ օրերին եդովմացիներն ապստամբեցին Հուդայի դեմ և իրենց համար թագավոր ընտրեցին։
9 Հովրամը գնաց իր իշխաններով ու հեծյալներով հանդերձ և գիշերը վեր կենալով՝ հարձակվեց եդովմացիների ու նրանց մարտակառքերի հրամանատարների վրա, որոնք պաշարել էին իրեն։ Եդովմացիների զորքը փախավ դեպի իրենց վրանները։
10 Այնուամենայնիվ Եդովմն ազատվեց Հուդայի գերիշխանությունից մինչև այսօր։ Այդ ժամանակ Լեբնան ևս ապստամբեց Հովրամի իշխանության դեմ, քանի որ Հովրամը լքել էր Տիրոջը՝ իր հայրերի Աստծուն,
11 պաշտամունքի բարձունքներ էր կառուցել տվել Հուդայի քաղաքներում, Երուսաղեմի բնակիչներին Աստծու հանդեպ անհավատարմության մղել ու մոլորեցրել Հուդայի երկրին։
12 Եղիա մարգարեից նրան գրություն եկավ, որի մեջ ասված էր. «Այսպես է ասում Տերը՝ քո նախահայր Դավթի Աստվածը. “Քանի որ չընթացար քո հոր՝ Հովսափատի ուղիով և ոչ էլ Հուդայի արքա Ասայի ուղիով,
13 այլ ընթացար Իսրայելի թագավորի ուղիով, Աստծու հանդեպ անհավատարմության մղեցիր Հուդային ու Երուսաղեմի բնակիչներին, ինչպես որ արել էր Աքաաբի տունը, և քո հոր որդիներին՝ քո եղբայրներին, որոնք քեզնից լավ էին, սպանեցիր,
14 ահա Տերը քեզ, քո ժողովրդին, քո որդիներին, քո կանանց և քո ամբողջ ունեցվածքին մեծ հարվածներ է հասցնելու։
15 Դու ծանր հիվանդությամբ ու որովայնի ախտով պիտի մաշվես, մինչև որ քո ախտահարված փորոտիքը օրեցօր դուրս թափվի”»։
16 Եվ Տերը Հովրամի դեմ հանեց այլազգիներին և եթովպացիների հարևան արաբներին։
17 Նրանք հարձակվեցին Հուդայի վրա, կողոպտեցին այն և տարան արքայի տան ամբողջ հարստությունը, նրա տղաներին ու աղջիկներին, և նա զրկվեց իր բոլոր որդիներից, բացի ամենակրտսեր որդուց՝ Օքոզիայից։
18 Այս ամենից հետո Տերը նրան որովայնի անբուժելի հիվանդությամբ հարվածեց։
19 Որոշ ժամանակ անց, երբ հասավ նրա վախճանը, ամբողջ երկու օր նրա ախտահարված փորոտիքը դուրս թափվեց, և նա մեռավ այդ ծանր հիվանդությունից։ Ժողովուրդը նրան հուղարկավորություն չարեց, ինչպես որ արել էր նրա նախնիներին։
20 Նա երեսուներկու տարեկան էր, երբ թագավոր դարձավ. ութ տարի թագավորեց Երուսաղեմում և մեռավ առանց դրվատանքի խոսքի և թաղվեց Դավթի քաղաքում, բայց ոչ թագավորների գերեզմանոցում։